အိမ်ခြေရာခြေမဲ့များအတွက် ပြည်သူ့အိမ်ရာစီမံကိန်း ဖော်ဆောင်မည် (အသံဖိုင်)

ပို့စ်တင်ချိန် - 6/12/2014 09:14:00 AM


ကျုးကျော်တွေနဲ့ မြေရာမဲ့သူတွေနေထိုင်ဖို့ ၂၀၁၅ ခုနှစ်မကုန်ခင် တနိုင်ငံလုံးရှိ မြို့ကြီး ၅၆ မြို့မှာ ပြည်သူ့အိမ်ရာစီမံကိန်းရေးဆွဲပြီး လုပ်ဆောင်ပေးမယ်လို့ ဆောက်လုပ်ရေးဝန်ကြီး ဌာန ဒုဝန်ကြီး ဦးစိုးတင့်က ပြောပါတယ်။

ဇွန်လ ၁၁ ရက် ပြည်သူ့လွှတ်တော်အစည်းအဝေးမှာ ကန်ပက်လက် မဲဆန္ဒနယ် ကိုယ်စားလှယ် သူရဦးအောင်ကိုက ကျူးကျော်ပြဿ နာ ဖြေရှင်းခြင်းအပါအဝင် အိမ်ရာလိုအပ်ချက်များ ဖြည့်ဆည်းပေးနိုင်ဖို့ မြို့သစ်အိမ်ရာ မြေကွက်ဖော်ထုတ်မှု စီမံကိန်းကို ၂၀၁၅ ခုနှစ်ကုန် မတိုင်မီ စတင်ဖော်ဆောင်ပေးရန် အစီအစဉ် ရှိ/မရှိ မေးမြန်းရာ ဒုဝန်ကြီးက အခုလို ဖြေကြားခဲ့တာဖြစ်ပါတယ်။

ဒီအကြောင်း ပြည်သူ့လွှတ်တော်တက်ခဲ့တဲ့ မြေပုံမြို့နယ် ပြည်သူ့လွှတ်တော်ကိုယ်စားလှယ် ဦးဖေသန်းက “တနိုင်ငံလုံး မြို့ကြီး ၅၆ မြို့မှာ အိမ်ရာစီမံကိန်းတွေ ဆွဲပြီးတော့ မြေယာမဲ့၊ အိမ်မဲ့ ပြဿ နာ တွေကို ဖြေရှင်းသွားမယ်လို့ ပြောတယ်။ လောလောဆယ်တော့ တန်ဖိုးနည်း အိမ်ရာတွေ ဆောက်ပြီးတော့ မြို့ကြီးတွေမှာ အိမ်ခန်းဘယ်လောက်စီ၊ တနှစ်ဘယ်လောက် အဲဒီလို စီမံချက်နဲ့ ဖြေရှင်းတယ်ပေါ့။ ၂၀၁၅ မကုန်ခင်မှာ အိမ်ရာစီမံကိန်းတွေကို မြို့ကြီး ၅၆ မြို့မှာ ဆွဲပြီးပါပြီလို့ ပြောပါတယ်”လို့ ပြောပါတယ်။

အစိုးရအနေနဲ့ အိမ်ရာတွေ ဖော်ထုတ်ပေးသလို အလုပ်အကိုင်အခွင့်အလမ်းတွေ ဖော်ထုတ်ပေးဖို့ တာဝန်ရှိတယ်လို့လည်း ဦးဖေသန်းက ပြောပါတယ်။

ရန်ကုန်မြို့က ဘောဂဗေဒပညာရှင် ဦးလှမောင်က ကျုးကျော်တွေနေဖို့ အိမ်ရာစီမံကိန်းတွေဟာ သူတို့ အလုပ်အကိုင်တွေ ရှိတဲ့နေရာနား ရှိဖို့လိုတယ်လို့ ထောက်ပြပါတယ်။

“မြို့ပေါ်မှာများ စက်ရုံတွေ ဘာတွေမှာများ အလုပ်ရမလား ဆိုပြီးတော့ လာတယ်။ ပြောင်းရွှေ့ရင်းနဲ့ နောက်ဆုံး လွတ်တဲ့ နေရာလေးမှာ လျှောက်လိုက်ပြီး တဲထိုးပြီး နေကြတယ်။ အဲဒါကို ကျူးကျော်လို့ ခေါ်တယ်ပေါ့။ သူတို့ရဲ့ စားဝတ်နေရေးနဲ့ တနေရာကို ပြောင်းရွှေ့မယ်ဆိုရင် သူတို့အလုပ်နဲ့ အဝေးကြီးရောက်သွားရင် ဘယ်လိုလုပ်မလဲဆိုတဲ့ ဟာတွေပါ ဖြေရှင်းပေးနိုင်မှ ကျူးကျော်ကို ဖယ်ထုတ်တယ်လို့ ဆိုနိုင်မှာပေါ့။”

လတ်တလောမှာ အစိုးရက ရန်ကုန်နဲ့ မန္တလေးမြို့တို့မှာ တန်ဖိုးနည်းအိမ်ရာတွေ ဖော်ထုတ်လုပ်ဆောင်နေပေမယ့် တိုက်ခန်းတခန်း ကျပ်သိန်း ၂၀၀ လောက် ရှိတာမို့ ၀င်ငွေနည်း ဆင်းရဲသားမိသားစုတွေ ၀ယ်ယူနိုင်ဖို့ အလှမ်းဝေးနေဆဲဖြစ်ပါတယ်။




DVB Burmese