အာဖဂန်ပြတိုက်တွင်ရှိသော သပိတ်သည် ဗုဒ္ဓနှင့် မည်သို့မျှ မဆက်စပ်ဟုဆို

ပို့စ်တင်ချိန် - 6/12/2014 09:28:00 AM





နယူးဒေလီ၊ ဇွန် ၁၀

အာဖဂန်ပြတိုက်တွင် ပြသထားသည့် သပိတ်ကြီး တစ်လုံးသည် ဗုဒ္ဓသပိတ်တော်ဟု အများက ထင်မြင်နေကြသလို မဟုတ်ကြောင်း၊ ဗုဒ္ဓနှင့်မည်သို့မျှ ဆက်စပ်ခြင်း မရှိသည့် ခွက်ကြီးတစ်လုံး ဖြစ်ကြောင်း အိန္ဒိယနိုင်ငံ ရှေးဟောင်း သုတေသနအဖွဲ့ (ASI) က ပြောကြားချက်ကို Zee News တွင်ဖော်ပြထားသည်။

ယင်းခွက်ကြီးပေါ်တွင် အာရဗီ ဘာသာစကားများဖြင့် ရေးထိုးထားပြီး ဗုဒ္ဓနှင့် ဆက်စပ်မှု တစ်စုံတစ်ရာ မရှိကြောင်း ယင်းသတင်းက ဆိုသည်။

ASI အဖွဲ့၏ အစီရင်ခံစာ၌ ယင်းခွက်ကြီးပေါ်တွင် ရေးထိုးထားသော အာရဗီ ဘာသာစကားများသည် ဗုဒ္ဓပေါ်ထွန်းသည့် ခေတ်တွင် မရှိသေးသည့် စာပေအရေးအသားများ ဖြစ်ကြောင်း၊ ဗုဒ္ဓခေတ်တွင် ရေးသားသည့် စာပေများသည် ပါဠိစာပေ အရေးအသားများသာ ဖြစ်ပြီး Brahmi သင်္ကေတများကိုသာ သုံးစွဲ ရေးသားလေ့ ရှိကြောင်း ဖော်ပြထားသည်။

အလေးချိန် ကီလိုဂရမ် ၄၀၀ ခန့် ရှိသည့် ယင်းခွက်ကြီးသည် ပါရှင်းဘာသာကို အာရဗီ သင်္ကေတများဖြင့် ရေးထိုးထားခြင်း ဖြစ်ကြောင်း၊ အာရဗီ အရေးအသားများသည် အေဒီ ၅ ရာစုခန့်တွင် ပေါ်ထွန်းခဲ့ပြီး ဗုဒ္ဓစာပေသည် ဘီစီ ၂ ရာစုနှင့် ၃ ရာစုကတည်းက ပေါ်ထွန်းခဲ့ကြောင်း၊ ဗုဒ္ဓနှင့် သက်ဆိုင်သည် ဆိုလျှင်လည်း ပါဠိဘာသာဖြင့်သာ ရေးထိုးရန် ရှိပြီး အာရဗီကဲ့သို့ ရေးထိုးရန် အကြောင်းမရှိကြောင်း သုတေသီများက ပြောကြားခဲ့သည်။

The Voice