မလေးရှားတွင် ဒုက္ခသည်အဖြစ် ခံယူလိုသူ မြန်မာအများဆုံးဟုဆို

ပို့စ်တင်ချိန် - 2/14/2014 07:57:00 PM


Anxious Rohingya refugees from Myanmar waiting for news on their temporary stay permits at UNHCR's Kuala Lumpur office. http://www.unhcr.org/41b9b7c84.html

ရန်ကုန်၊ ဖေဖော်ဝါရီ ၁၃

မလေးရှားနိုင်ငံတွင် ဒုက္ခသည်အဖြစ် လျှောက်ထားသူ အများစုမှာ မြန်မာနိုင်ငံသားများ ဖြစ်ကြောင်း မလေးရှားနိုင်ငံ ဝန်ကြီးချုပ်ရုံး ဝန်ကြီးက Datuk Seri Mohamed Aziz ၏ ပြောကြားချက်ကို ကိုးကား၍ ဖေဖော်ဝါရီ ၁၀ ရက်နေ့ထုတ် မလေးရှားနိုင်ငံပိုင် သတင်းစာများတွင် ဖော်ပြသည်။

ဒုက္ခသည်အဖြစ် လျှောက်ထားသူ ၁၀၈၅၀ ဦးအနက် မြန်မာနိုင်ငံသား ၇၅၈၂ ဦး ရှိကြောင်း ၎င်းက၂၀၁၃ ခုနှစ် သြဂုတ်လထိ ပြုစုထားသည့် စာရင်းများအရ အခြေခံကာ ပြောဆိုသည်။

ကွာလာလမ်ပူမြို့တော်ရှိ UNHCR ရုံးက ဒုက္ခသည်အဖြစ် လျှောက်ထားသူ များကို စိစစ်ပြီး နိုင်ငံခြားသားပေါင်း ကိုးသောင်းကျော်ကို ဒုက္ခသည်အဖြစ် အသိအမှတ် ပြုခဲ့ကြောင်း၊ မလေးရှားနိုင်ငံက ဒုက္ခသည်အရေးနှင့် ပတ်သက်ပြီး သဘောတူစာချုပ် ချုပ်ဆိုမထားသော်လည်း UNHCR လက်မှတ်ရှိသူကို လူသားချင်း စာနာသောအားဖြင့် ဖမ်းဆီးခြင်း မရှိဟု Datuk Seri Mohamed Aziz က ဆိုသည်။

ဒုက္ခသည်တို့၏ စားဝတ်နေရေး၊ လုံခြုံရေးကို တာဝန် မယူနိုင်သောကြောင့် ကုလသမဂ္ဂ၏ ၁၉၅၁ နှင့် ၁၉၆၇ ခုနှစ်တို့တွင် ပေါ်ပေါက်ခဲ့သော ဒုက္ခသည်များ လက်ခံရေးဆိုင်ရာ သဘောတူ စာချုပ်များကို မလေးရှား အစိုးရက လက်မှတ်ရေးထိုးခြင်း မရှိသေးပေ။
The Voice Weekly